U. Iturriaga:
Holakoak sarritan
pasatuak ditut
niri begira orduak
zalantza baten truk.
Pentsamentu berbera
izango duzu zuk:
nigandik zatoz baina
zure antzik ez dut. (bis)
A. Egaña:
Hori zer zen lorea
edota zen burla?
Noizbait aldatu zen bai
geneen formula.
Inork esan al dizu
tximino sekula
Richard Gereren antza
haundia duzula? (bis)
U. Iturriaga:
Norbaiten antza hartu
antza derrepente
horretan ibiltzen da
hemen zenbait jente.
Hori nor den ez dakit
azal zenezake?
Copito Nieverena
hartu izan didate. (bis)
A. Egaña:
Zure begiek duten
berezko dizdira
gure elkarrizketa
zentratzen ari da
Copiton antza pixkat
badaukazu tira!
Baina patilla hoiek
aitarenak dira. (bis)
U. Iturriaga:
Nik uste nuen bezain
tontoa ez zara zu
tximino askaziaz
zerbait badakizu.
Azkenerako lagun
egingo gara aizu!
Tori platano hau ta
zuritu zaidazu. (bis)
A. Egaña:
Horretarako ez dut
konplejurik bat’e
zure platano hori
zuritu nezake.
Zabal zaidazu beraz
krisketa ta ate
kaiolaren barruan
erre al daiteke? (bis)
U. Iturriaga:
Akaso edan dozu
litroka ardaua
zoaz behingoz hemendik
egin baita gaua.
Orain txorta jotzea
da gure araua
hau intimoa da ta
angaua! Angaua! (bis)
A. Egaña:
“Angaua! Angaua!” dio
amorruz beteta
ia hobe nuke bai
hemendik gordeta.
Txorta jotzeko ordua
duela puñeta!
Beraz bejondeizula
bakarrik zaude ta! (bis)
Jaio 1958-03-30
Soraluzeko (Gipuzkoa) Illordo baserrian jaio zen 1958ko martxoaren 30ean. Euskal Herriko Bertsozale Elkartea (EHBE) sortu eta hilabete gutxira egin zen bazkide. Gipuzkoako Bertsozale Elkarteko Zuzendaritza kide izan zen 1989-1990 urtetan.
EHBE.k abian jarri zituen lehen proiektuetakoak izan ziren plazaz plazako bertso saioen grabaketa eta Bapatean, bertso hautatuen argitalpena. Iñaki, ordurako, hasia zen han-hemen bertso saioak grabatzen, eta Elkarteak eskatuta, Laxaro Azkune eta Jose Antonio Gesalaga "Zaldubi"rekin batera, bera izan zen Elkartearen lehen bertso saioak grabatu eta biltzaileko taldea osatu zuenetakoa; Bapatean 1988, 1989 eta 1990 libururako hautaketa eta transkripzio lanak egin zituen "Zaldubi"rekin batera.
Egikizun horretan jardun zen lau urtez, 1987-1990 urtetan. Horren emaitza dira urte horietako grabaketa bilduma zabala eta Bapatean bertso-liburuaren lehen hiru aleak, 1988, 1989 eta 1990ekoa; Euskal Herriko Bertsolari Txapelketa Nagusia 1989ko libururako bertso-transkribaketa lanetan ere hartu zuen parte.
Gaixotasun goiztiar batek behartu zuen 1991eko hastapenetan bertso-bilketa eta gainerako lanak uztea. Donostiako ospitalean zendu zen 2019ko urriaren 5ean, 61 urte zituela.
